AKBA: Mikromaliyyə təşkilatları bir ildə 65 milyon manatlıq istiqraz buraxıb

AMFA-nın təşkil etdiyi konfransda çıxış edən Orxan Bağırov qeyd edib ki, sığorta şirkətlərinin təxminən 900 milyon manatlıq vəsaitinin bir hissəsi faiz gəliri üçün yerləşdirilir və Mərkəzi Bankın məlumatına görə, sığorta ehtiyatlarının təxminən 60 %-i bu məqsədə yönəlir. Onun sözlərinə görə, mövcud 65 milyon manatlıq istiqraz bazarından sektorun illik gəliri cəmi 2–4,6 milyon manat təşkil edir ki, bu da ümumi portfelin gəlirliliyinə maksimum 0,3 % təsir göstərir. Bağırov vurğulayıb ki, problem istiqrazların gəlirliliyində deyil, bazarın kiçik həcmindədir. Mikromaliyyə təşkilatlarının ümumi portfeli 1,6 milyard manat olmaqla, bunun təxminən 20 %-i, yəni 320 milyon manatlıq hissəsi istiqrazlar vasitəsilə maliyyələşdirilə bilər. Bağırovun sözlərinə görə, hazırkı istiqraz buraxılışları 4 dəfə artırılsa belə, sığorta şirkətlərinin bu qiymətli kağızları almaq üçün kifayət qədər potensialı mövcuddur.