Azərbaycanda dövlət xidmətləri və telekom sahəsində yeni cərimələr planlaşdırılır

Hazırlanan sənədə əsasən, müəyyən edilmiş keyfiyyət göstəricilərinə uyğun telekommunikasiya xidməti göstərməyən vəzifəli şəxslər 500 manat, hüquqi şəxslər isə 1000 manat məbləğində cərimə ilə üzləşə bilər. Təkrar pozuntu halında bu məbləğlər müvafiq olaraq 1000 və 2000 manata qədər artırıla bilər.

Korrupsiya barədə məlumat verən şəxsə qisas məqsədilə işdən çıxarma, əməkhaqqından qanunsuz tutulma və ya vəzifə irəliləyişinə mane olma kimi hərəkətlərə görə 3000–5000 manat cərimə nəzərdə tutulur.

Dövlət xidmətləri sahəsində pozuntulara görə vəzifəli şəxslər 250–1050 manat aralığında cərimələnə bilər. Elektron ödəniş imkanının yaradılmaması 450–550 manat, xidmətdən imtina əsasları və şikayət hüququ barədə məlumat verilməməsi isə 650–750 manat cərimə ilə nəticələnə bilər.

Əlilliyi olan şəxslər üçün uyğun şərait yaradılmaması və ya səyyar xidmətin göstərilməməsinə görə 750–850 manat cərimə təklif olunur. Ətraf mühitin monitorinqi üzrə illik hesabatın vaxtında təqdim edilməməsinə görə isə vəzifəli şəxslər 3000 manat, hüquqi şəxslər 8000 manat cərimə ilə qarşılaşa bilər.

Pulsuz hüquqi yardımdan əsassız imtinaya görə fiziki şəxslər 100–200 manat, vəzifəli şəxslər 200–300 manat, hüquqi şəxslər isə 300–400 manat cərimələnəcək. Bu qayda “pro bono” əsaslı hüquq xidməti göstərənlərə şamil edilmir.